თაიმლაინი

ივნისი, 2019 (4 ღონისძიება)

საქართველოს სათხილამურო ფედერაციასა და კორეის სათხილამურო ასოციაციას შორის ურთიერთგაგების მემორანდუმი გაფორმდა

                                           

12-14 ივნისს სამხრეთ კორეის დედაქალაქ სეულში ოფიციალური ვიზიტით იმყოფებოდნენ საქართველოს სათხილამურო ფედერაციის პრეზიდენტი ზურაბ კოსტავა, საქართველოს მთის კურორტების განვითარები კომპანიის ხელმძღვანელი თამაზ გამცემლიძე და ტურიზმის ეროვნული ადმინისტრაციის წარმომადგენლები. მათ მასპინძლობდა საქართველოს ელჩი სამხრეთ კორეაში ბატონი ოთარ ბერძენიშვილი. 

2018 წელს სამხრეთ კორეის რესპუბლიკა, ქალაქი პიონგჩანგი იყო მასპინძელი ზამთრის ოლიმპიადის, ასევე კორეაში გაიმართა სათხილამურო და სნოუბორის ფრისტაილის მსოფლიო ჩემპიონატი. 2007 წლიდან მოყოლებული ყოველწლიურად კორეა მასპინძლობს სამთო-სათხილამურო და ფრისტაილის მსოფლიო თასის ეტაპებს.

2023 წელს ბაკურიანი უმასპინძლებს სათხილამურო და სნოუბორდის მსოფლიო ჩემპიონატს. ამასთან დაკავშირებით ამა წლის გაზაფხულზე ბატონმა ოთარ ბერძენიშვილმა დაიწყო მუშაობა იმის შესახებ, რომ კორეის რესპუბლიკას საქართველოსთვის გაეზიარებიანა თავისი გამოცდილება. მისი ძალისხმევით 14 ივნისს საქართველოს სათხილამურო ფედერაციასა და კორეის სათხილამურო ასოციაციას შორის ურთიერთგაგების მემორანდუმი გაფორმდა. მემორანდუმს ხელი მოაწერეს საქართველოს სათხილამურო ფედერაციის პრეზიდენტმა ზურაბ კოსტავამ და კორეის სათხილამურო ასოციაციის პრეზიდენტმა კიმ ჩე-ჰიუნმა.

კორეის მხარემ საქართველოს აღუთქვა გამოცდილების გაზიარება.

პიონგჩანგის მერმა - ჰან ვანგ-კიმ კმაყოფილებით აღნიშნა, რომ საქართველოს აქვს მთის კურორტების განვითარების დიდი პოტენციალი და კორეული მხარე მზად არის მონაწილეობა მიიღოს ამ მხრივ დაგეგმილი  ცალკეული  პროექტების  განხორციელებაში. ასევე მან თქვა, რომ პიონგჩანგის  დელეგაცია  სიამოვნებით დაესწრება 2023 წლის სათხილამურო და სნოუბორდის ფრისტაილის მსოფლიო ჩემპიონატს, რომელიც ბაკურიანში გაიმართება.

სრულად 19 ივნ

იასონ აბრამაშვილმა და ალექსი ბენიაიძემ კარიერა დაასრულეს

მრავალწლიანი პროფესიონალური სამთო-სათხილამურო მოღვაწეობის შემდეგ საქართველოს სამთო-მოთხილამურეთა ნაკრების წევრებმა: იასონ აბრამაშვილმა და ალექსი ბენიაიძემ კარიერის დასრულება გადაწყვიტეს.

31 წლის იასონ აბრამაშვილი ბაკურიანელია. იასონი თხილამურებზე 2 წლიდან დგას. FIS-ის საერთაშორისო შეჯიბრებებზე კი 2003 წლიდან ასპარეზობდა. საქართველოს პირველმა სამთო-მოთხილამურემ ამ პერიოდში ბევრ წარმატებას მიაღწია. იასონი 4-გზის ოლიმპიელია. (ტურინი 2006, ვანკუვერი 2010, სოჭი 2014 და პიონგჩანგი 2018). იასონმა სოჭის ოლიმპიადაზე სლალომში 22-ე ადგილი დაიკავა, რაც საქართველოს სამთო-სათხილამურო სპორტის ისტორიაში სლალომის სახეობაში პირველი შემთხვევა იყო. იასონმა 7 მსოფლიო ჩემპიონატზე იასპარეზა. მისი საუკეთესო შედეგი 2007 წლის არეს მსოფლიო ჩემპიონატზე 28-ე ადგილი იყო. იგი საქართველოს მრავალგზის ჩემპიონი, მრავალი საერთაშორისო შეჯიბრის გამარჯვებული და პრიზიორია. მან 2018/19 წლის სეზონის დასრულების შემდეგ კარიერის დასრულება გადაწყვიტა. ამჟამად იასონი საქართველოს ბავშვთა სამთო-სათხილამურო ნაკრების მწვრთნელია.

28 წლის ალექსი ბენიაიძე კი გუდაურში გაიზარდა, თხილამურებზე 5 წლიდან დგას. 2007 წლიდან ალექსი FIS-ის საერთაშორისო შეჯიბრებებზე რეგულარულად ასპარეზობდა. ალექსი 2014 წლის სოჭის ოლიმპიადის მონაწილეა, მან მსოფლიო ჩემპიონატებზე 6-ჯერ მიიღო მონაწილეობა. მისი საუკეთესო შედეგი 2009 წელს ვალ დიზერში 35-ე ადგილი იყო. ალექსი საქართველოს მრავალგზის ჩემპიონი და პრიზიორია, ასევე მრავალი საერთაშორისო შეჯიბრების გამარჯვებული და პრიზიორი. ალექსიმ 2018-2019 წლის ზამთრის სეზონის შემდეგ კარიერის დასრულების შესახებ განაცხადა.

იასონმა და ალექსიმ დრო გამონახეს და რამდენიმე კითხვაზე გვიპასუხეს: -

 

იასონ რას ნიშნავდა შენთვის სპორტსმენობა - მოთხილამურეობა?

სპორტსმენობა და სათხილამურო სპორტი იყო წლების მანძილზე უმთავრესი საქმე, რომელიც მიყვარდა და სიამოვნებას მანიჭებდა. ფაქტიურად ახალგაზრდობის უმეტესი ნაწილი ამ სპორტს მივუძღვენი. სპორტი არის ასევე ურთიერთობა, სადაც უამრავ დადებითს სწავლობ ცხოვრებაში.

ყველაზე კარგად რომელი წარმატება გახსენდება?

არაერთი საერთაშორისო შეჯიბრის გამარჯვებული და პრიზიორი ვარ, თუმცა ყველაზე დასამახსოვრებელი 2013 წელს გერმანიაში სლალომში გამარჯვება იყო, ეს იყო FIS-ის შეჯიბრი, რომელიც საკმაოდ რეიტინგული იყო. ასევე გამოვყოფდი 2013 წლის სანტ-მორიცის მსოფლიო ჩემპიონატის საკვალიფიკაციო დაშვებას, სადაც მე-5 ადგილი დავიკავე. ათიათასი მაყურებლის წინაშე საუკეთესო ექვსეული დაგვაჯილდოვეს, რაც საკმაოდ ემოციური იყო.

რთული იყო ამ გადაწყვეტილების მიღება?

სპორტულ კარიერაში სამჯერ მქონდა პაუზა სხვა და სხვა დროს. ამ სპორტის მონატრება, სიყვარული იმდენად დიდი იყო, რომ სიხარულით დავუბრუნდი და 20 წლის განმავლობაში საყვარელ საქმეს პროფესიონალურ დონეზე ვემსახურე.  ამ დროის მანძილზე ოთხ ოლიმპიურ თამაშებზე, შვიდ მსოფლიო ჩემპიონატზე და რამდენიმე ასეული საერთაშორისო ტურნირზე საქართველოს სახელით ვიასპარეზე, რაც ყოველთვის მეამაყებოდა. რაც შეეხება კარიერის დასრულებას, ამჯერად შეგუებული ვიყავი რომ თავს ვანებებდი. 2019 წლის თებერვალში მსოფლიო ჩემპიონატზე ასპარეზობის შემდეგ მრავალწლიანი სპორტული კარიერა დავასრულე.

იასონ რას გეგმავ მომავალშ?

ისევ ამ სპორტის გარშემო მაქვს მომავალი გეგმები. ამჟამად ახალგაზრდულ გუნდს აქტიურად ჩავუდექი სათავეში. ვართ მომავალი თაობის შერჩევის პროცესში. ასევე ვაპირებ სულ მალე სათხილამურო სკოლის შექმნას, სადაც იმედი მაქვს  წარმატებული მოთხილამურეები გაიზრდებიან.

დიდი მადლობა საინტერესო საუბრისთვის, წარმატებებს გისურვებთ!

დიდი მადლობა თქვენ! გვერდში დგომისთვის მინდა დიდი მადლობა გადავუხადო ჩემს ოჯახს, მწვრთნელებს, თანაგუნდელებს, საქართველოს სათხილამურო ფედერაციას, სპორტის სამინისტროს, საქართველოს ოლიმპიურ კომიტეტს, ასევე დიდი მადლობა გენერალურ სპონსორს - ,,სილქნეტს“ და მის ხელმძღვანელს ბატონ გიორგი რამიშვილს, რომელიც წლების მანძილზე გვერდში უდგას სათხილამურო სპორტს.

ინტერვიუ ალექსი ბენიაიძესთან:

ალექსი, რამდენი წლის დადექი თხილამურებზე და იყო თუ არა შენი ოცნება სპორტსმენობა?

პირველად თხილამურზე 5 წლის ასაკში დავდექი და ამ ასაკში ძნელია გადაწყვიტო გინდა თუ არა გახდე პროფესიონალი მოთხილამურე, მაგრამ რამდენიმე წლის ვარჯიშისა და ზამთრის სეზონზე თითქმის ყოველდღიური სრიალის შემდეგ მივხვდი, რომ ეს იყო ის საქმე, რაც მიყვარდა და მინდოდა მეკეთებინა.

ყველაზე კარგად რომელი წარმატება გახსენდება?

ყველაზე კარგად ის წარმატებები მახსენდება, სადაც შეჯიბრის გამარჯვებული გავმხდარვარ, მაგრამ, სამწუხაროდ, არასდროს არ გამიმარჯვია ევროპის ან მსოფლიო ჩემპიონატზე, თუმცა მე და ჩემს გუნდელებს დიდი კონკურენცია გაგვიწევია წამყვანი მოთხილამურეებისთვის, რაც ძალიან დიდი სტიმულის მომცემი იყო ჩემთვის.

რა მოგცა ცხოვრებაში პროფესიონალურმა სპორტმა?

ამ სპორტმა მასწავლა საქმისადმი სიყვარული, რასაც აკეთებ ადამიანი, კარგად უნდა აკეთო. თავდადება, მეგობრების გვერდში დგომა და მათი წარმატების გაზიარება, მოკლედ ბევრი რამ, რაც ადამიანს შემდგომ ცხოვრებაში აუცილებლად გამოგადგება. მთა და თხილამურები ჩემი ცხორების ნაწილია, რასაც ვერასდროს ვერ მივატოვებ. დიდი მადლობა მინდა გადავუხადო ყველას, ვინც ამ წლების განმავლობაში გვერდში გვედგა: საქართველოს სათხილამურო ფედერაციას, სპორტის სამინისტროს, კომპანია ,,სილქნეტს“, ოლიმპიურ კომიტეტსა და მწვრთნელებს.

დიდი მადლობა საინტერესო საუბრისთვის, წარმატებებს გისურვებთ!

დიდი მადლობა თქვენ!


 

საქართველოს სათხილამურო ფედერაცია მადლობას უხდის იასონ აბრამაშვილსა და ალექსი ბენიაიძეს. იმედი გვაქვს ისინი სათხილამურო სფეროში დარჩებიან და საქართველოში სპორტის ამ სახეობის განვითარებას ახლა უკვე სხვა კუთხით შეუწყობენ ხელს.

წარმატებებს ვუსურვებთ მათ!

 

 

 

სრულად 13 ივნ

მთა მყინვარწვერის გეოდეზიური გადაზომვის შედეგების თაობაზე

საქართველოს უმაღლესი მწვერვალების აბსოლუტური სიმაღლეების გეოდეზიური გადაზომვა თანამედროვე ტექნოლოგიების გამოყენებით და ადგილებზე შესაბამისი სასიმაღლო რეპერების გამყარების პროცესის ხელშეწყობა  კავკასიის სკი-ტურინგის ქსელის ინიციატივაა.

ინიციატივის ფარგფლებში, რომელიც მოიცავს მულტი-პარტნიორული ფლატფორმის (სახელმწიფო-კერძო-საზოგადოებრივი) შექმნის მცდელობას, საპილოტე პროექტის სახით განხორციელდა მთა მყინვარწვერის რეალური სიმაღლის დადგენის პროექტი.

მყინვარწვერის სიმაღლე პირველად გასული საუკუნის 60-იან წლებში გაიზომა და ზღვის დონიდან 5047 მეტრით განისაზღვრა, ხოლო მეორედ - 80-იან წლებში და 5033 მეტრით. 

კავკასიის სკი-ტურინგის ქსელთან ერთად პროექტში მონაწილეობდნენ:  ყაზბეგის მუნიციპალიტეტი, საჯარო რეესტრის ეროვნული სააგენტო, ტურიზმის ეროვნული ადმინისტრაცია, სამთო-ქოხი ,,ალტი-ჰატი", საქართველოს მთასვლელთა გაერთიანებული ფედერაცია, საქართველოს სათხილამურო ფედერაცია, „National Geographic საქართველო“, ,,ყაზბეგი-ჰელიკოპტერსი", სატუმრო ,,რუმსი", მაღაზია ,,მოგზაური",  სამთო ქოხი ,,ბეთლემი", კომანია ,,მაგთი", კომპანია ,,ჯეოლენდი", კომპანია ,,ტერაგრაფიკი", კომპანია ,,გეოგრაფიკი", კომპანია ,,ზედაზენი", კომპანია ,,კაპაროლი", კომპანია ,,საქკაბელი", მთის სპეციალისტი გიორგი კახაბრიშვილი, მთამსვლელი და პუბლიცისტი ნიკა ლებანიძე, პუბლიცისტები ენდრიუ ნორსი და რატი ამაღლობელი; სხვა სპეციალისტები და ორგანიზაციები.

ახალი ნიშნულისა გასაჯაროება და ექპსედიციის სხვა შედეგების გაზიარება  2019 წლის 15 ივნისს, ყაზბეგის მუნიციპალიტეტში, დაბა სტეფანწმინდაში, სასტუმრო რუმსში 14:00-საათზე მოხდება.

გთხოვთ გვეწვიოთ

პატივისცემით,

კავკასიის სკი-ტურინგის ქსელის ადმინისტრაცია

სრულად 13 ივნ

ქართველი მოთხილამურეები ავსტრიაში სავარჯიშო შეკრებაზე გაემგზავრნენ

4 ივნისს ქართველი სამთო-მოთხილამურე ბავშვები: ლუკა ბურდული, კონსტანტინე გოცირიძე, ლუკა ბუჩუკური, ლევან ნაზღაიძე, ოთარ ხვედელიძე, ოთარ წულეისკირი მწვრთნელებთან: იასონ აბრამაშვილთან და ირაკლი ნასყიდაშვილთან ერთად ავსტრიაში გაემგზავრნენ.

მათთან ერთად გაემგზავრა ფრისტაილის ნაკრების წევრი: ბექა ბერძენიშვილი.

ისინი ავსტრიის ცნობილ მყინვარზე - ჰინტერტუქსში ათი დღის განმავლობაში ივარჯიშებენ.

წარმატებულ ვარჯიშს ვუსურვებთ ჩვენს მოთხილამურეებს!

 

სრულად 5 ივნ
მაისი, 2019 (3 ღონისძიება)

2018-2019 წლის სათხილამურო სეზონის შეჯამება

წელს გუდაურმა პირველად საერთაშორისო სათხილამურო ფედერაციის (FIS-ის) ეგიდით გამართულ რამდენიმე მნიშვნელოვან ღონისძიებას უმასპინძლა. გაიმართა სნოუბორდ ქროსისა და სქი ქროსის ევროპის თასის ეტაპები, ასევე სარეიტინგო შეჯიბრებები. საქართველოს 150-მდე უცხოელი სპორტსმენი ესტუმრა.  

შეჯიბრებები მაღალ დონეზე ჩატარდა და უცხოელი ექსპერტების მიერ დადებითი შეფასება დაიმსახურა. მოსამზადებელი პროცესი რამდენიმე თვე გრძელებოდა. მასში ჩართული იყვნენ ყოფილი და ამჟამინდელი ნაკრების წევრები, რეგიონალური ფედერაციების წარმომადგენლები, გუდაურის მოსახლეობა და მოხალისეთა ჯგუფები.

საქართველოს სათხილამურო ფედერაციის ინიციატივით საერთაშორისო შეჯიბრებების წარმატებით ჩატარებაში შეტანილი წვლილისთვის,  მოხალისეებს მადლობის სიგელები გადაეცათ.

ღონისძიება 21 მაისს სასტუმრო „რადისონში“ გაიმართა.

მომავალ,  2019-2020 წლის ზამთრის სეზონზე საქართველოში  მსოფლიო თასის ეტაპები გაიმართება, სადაც უფრო მეტი მოხალისე მიიღებს მონაწილეობას.  2023 წელს კი, ბაკურიანში ფრისტაილის სათხილამურო და სნოუბორდის მსოფლიო ჩემპიონატი გაიმართება.

 

სრულად 22 მაისი

2018-2019 წლის სათხილამურო სეზონის შეჯამება

წელს გუდაურმა პირველად საერთაშორისო სათხილამურო ფედერაციის (FIS-ის) ეგიდით გამართულ რამდენიმე მნიშვნელოვან ღონისძიებას უმასპინძლა. გაიმართა სნოუბორდ ქროსისა და სქი ქროსის ევროპის თასის ეტაპები, ასევე სარეიტინგო შეჯიბრებები. საქართველოს 150-მდე უცხოელი სპორტსმენი ესტუმრა.  

შეჯიბრებები მაღალ დონეზე ჩატარდა და უცხოელი ექსპერტების მიერ დადებითი შეფასება დაიმსახურა. მოსამზადებელი პროცესი რამდენიმე თვე გრძელებოდა. მასში ჩართული იყვნენ ყოფილი და ამჟამინდელი ნაკრების წევრები, რეგიონალური ფედერაციების წარმომადგენლები, გუდაურის მოსახლეობა და მოხალისეთა ჯგუფები.

საქართველოს სათხილამურო ფედერაციის ინიციატივით საერთაშორისო შეჯიბრებების წარმატებით ჩატარებაში შეტანილი წვლილისთვის,  მოხალისეებს მადლობის სიგელები გადაეცემათ.

ღონისძიება დღეს, 21 მაისს, 18:00 საათზე სასტუმრო „რადისონში“ გაიმართება.

მომავალ,  2019-2020 წლის ზამთრის სეზონზე საქართველოში  მსოფლიო თასის ეტაპები გაიმართება, სადაც უფრო მეტი მოხალისე მიიღებს მონაწილეობას.  2023 წელს კი, ბაკურიანში ფრისტაილის სათხილამურო და სნოუბორდის მსოფლიო ჩემპიონატი გაიმართება.

 

 

სრულად 21 მაისი

ქართველი მოთხილამურეები ავსტრიაში გაემგზავრნენ

19 მაისს საქართველოს სამთო-მოთხილამურეთა  ნაკრების წევრები: სოსო ჯაფარიძე, ბესარიონ ჯაფარიძე, სანდრო ჟორჟოლიანი, ნოდარ კოზანაშვილი და მათი მწვრთნელები: ვახტანგ თედიაშვილი და იბრაგიმ ჯანიძე ავსტრიაში გაემგზავრნენ. მათთან ერთად ავსტრიაში იმყოფება საქართველოს სქი ქროსის ნაკრების წევრი დავით თედიაშვილი.

ავსტრიის ცნობილ მყინვარ - ჰინტერტუქსში ისინი ორი კვირის განმავლობაში ივარჯიშებენ.

ჩვენს მოთხილამურეებს წარმატებულ ვარჯიშს ვუსურვებთ!

სრულად 20 მაისი
აპრილი, 2019 (2 ღონისძიება)

საქართველოს სამთო-მოთხილამურეთა ბავშვთა ნაკრები იტალიაში ,,პინოქიოს“ შეჯიბრზე იასპარეზებს

დღეს, 3 აპრილს საქართველოს სამთო-მოთხილამურეთა ბავშვთა ნაკრების წევრები: ლუკა ბუჩუკური, ირაკლი არღვლიანი, მიხეილ ჩართოლანი, ნიკოლოზ გაგაძე, გიორგი გულედანი და ლევან ნაზღაიძე თავიანთ მწვრთნელებთან: იასონ აბრამაშვილთან და იბრაგიმ ჯანიძესთან ერთად იტალიაში გაემგზავრნენ.

5-6 აპრილს იტალიის კურორტ აბეტონეში საერთაშორისო სათხილამურო ფედერაციის FIS-ის ეგიდით ბავშვთა შორის გაიმართება შეჯიბრება ,,პინოქიო“, სადაც ქართველი მოთხილამურეები მიიღებენ მონაწილეობას.

წარმატებებს ვუსურვებთ ჩვენს პატარა მოთხილამურეებს!

სრულად 3 აპრ

საქართველოს 2019 წლის სამთო-სათხილამურო თასის გათამაშება დასრულდა

 

30-31 მარტს, 2019 წლის საქართველოს სამთო-სათხილამურო თასის ფინალურ ეტაპს გუდაურმა უმასპინძლა.  

შეჯიბრება  ,,კუდების“ ფერდობზე სლალომსა და გიგანტურ სლალომში ჩატარდა.

მზიანმა ამინდმა სპორტსმენებსა და ორგანიზატორებს ხელი შეუწყო, რომ შეჯიბრი წარმატებით ჩატარებულიყო.

შეჯიბრში მონაწილეობა მიიღეს: გუდაურის, ბაკურიანის, მესტიის, აჭარისა და ბაკურიანის სპორტ-სკოლების ასოციაციის ნაკრებმა გუნდებმა.

აღსანიშნავია, რომ ამ შეჯიბრებაზე მოხალისეებად საქართველოს ნაკრების ყოფილმა წევრებმა: იასონ აბრამაშვილმა, ალექსი ბენიაიძემ, ჯაბა გელაშვილმა, გოგა ოგბაიძემ, დაჩი ბუჩუკურმა და ნაკრების ყოფილმა მწვრთნელმა ჯოვანი ლაზარინიმ იმუშავეს.

სამთო-მოთხილამურეებმა საქართველოს სხვადასხვა რეგიონებიდან ოფიციალურად სამ ასაკობრივ ჯგუფში იასპარეზეს, მაგრამ დღევანდელი გიგანტური სლალომის შეჯიბრი იმით გამოირჩეოდა, რომ 2007-2010 წლებში დაბადებული პერსპექტიული მოთხილამურეებიც შეეჯიბრნენ ერთმანეთს.

ოთხი ჩატარებული ეტაპების შედეგებით გამოვლინდნენ 2019 წლის საქართველოს სამთო-სათხილამურო თასის მფლობელები.

სრული შედეგები იხ. www.gsf.ge

2018-2019 წლის ზამთრის სეზონზე სვანეთის, გუდაურის, აჭარის და ბაკურიანის სპორტ-სკოლების ათ-ათ სამთო-მოთხილამურეს აქვს მოპოვებული უპირატესობა  საქართველოს თასის გათამაშების ეტაპებზე. სწორედ მათ ჰქონდათ საშუალება ესახელებინათ თავიანთი გუნდები.

აღსანიშნავია, რომ 2018 წლიდან გუნდურ შეჯიბრში საქართველოს თასის გათამაშების გამარჯვებულ რეგიონს, გუდაურის დამაარსებლის სოლიკო ხაბეიშვილის სახელობის  გარდამავალი თასი გადაეცემა.

1988 წელს გუდაური, როგორც სათხილამურო კურორტი, სწორედ სოლიკო ხაბეიშვილის დიდი ძალისხმევით დაარსდა.

1991-1993 წლებში სოლიკო ხაბეიშვილი იყო საქართველოს სათხილამურო ფედერაციის პირველი პრეზიდენტი.

გუდაურის კურორტის დაარსებისა და მისი განვითარების საქმეში შეტანილი ღვაწლის აღსანიშნავად, მეორე წელია სოლიკო ხაბეიშვილის სახელობის თასი  გადაეცემა გამარჯვებულ გუნდს. საერთო გუნდურ ჩათვლაში  გამარჯვებული სვანეთის ნაკრები გახდა.

უკვე მეექვსე წელია, რაც უმცროსი ასაკის გამარჯვებული სამთო-მოთხილამურეები, გურამ გირგვლიანის ინიციატივით, სანდრო გირგვლიანისა და ირინა ენუქიძის ფონდიდან ფულადი პრიზით ჯილდოვდებიან. აღნიშნული პრიზი ახალგაზრდა სპორტსმენებისთვის სტიმულის მიცემის მიზნით დაარსდა. 

საქართველოს სათხილამურო ფედერაციის თასის ეტაპების გენერალური სპონსორი კომპანიასილქნეტია,,, მხარდამჭერებიკულტურისა და სპორტის სამინისტრომთის კურორტების განვითარების კომპანია და კომპანია ,,ბორჯომი“. 

ხაზგასმით გვინდა აღვნიშნოთ საქართველოში ჩატარებული სამთო-სათხილამურო და ფრისტაილის ყველა შეჯიბრზე სპორტსმენების გვერდით ,,რედბულისა“ და სოსისების კომპანია ,,ვაკის“ მონაწილეობა.

საქართველოს თასის გათამაშების ფინალური ეტაპისა და საერთო ჩათვლაში გამარჯვებულები  შეჯიბრების დასრულების შემდეგ ,,cub``-ის მიმდებარე საგანგებოდ მოწყობილ ტერიტორიაზე მუსიკის თანხლებით საზეიმო ვითარებაში დაჯილდოვდნენ.

ვულოცავთ ჩვენს სპორტსმენებს წარმატებას!

სრულად 1 აპრ
მარტი, 2019 (3 ღონისძიება)

დღეს გუდაურში საქართველოს სამთო-სათხილამურო სლალომისა და ფრისტაილის თასის ეტაპები გაიმართა

                                                                                   

დღეს, 30 მარტს, გუდაურში ,,კუდების“ ფერდობზე 2019 წლის საქართველოს სამთო-სათხილამურო თასის ფინალური, მეოთხე ეტაპის პირველი შეჯიბრება - სლალომი გაიმართა. დღესვე გუდაურში ,,უაით რებითის“ ტერიტორიაზე ფრისტაილის ,,ბიგ ეარის“ სახეობაში საქართველოს თასის ფინალური - მესამე ეტაპი ჩატარდა.

,,ბიგ ეარის“ შეჯიბრება ბექა ბურდულმა მოიგო, მეორე და მესამე ადგილებზე: რეზი ბურდული და გიორგი მელიქიშვილი გავიდნენ.

აღსანიშნავი და სასიხარულოა, რომ საქართველოში სპორტის ამ სახეობისადმი (ფრისტაილი) ინტერესი ყოველწლიურად იზრდება, რაც განპირობებულია იმით, რომ 2023 წელს საქართველოში ჩატარდება ფრისტაილის მსოფლიო ჩემპიონატი. 

სამთო-მოთხილამურეებმა კი საქართველოს სხვადასხვა რეგიონებიდან ტრადიციულად სამ ასაკობრივ ჯგუფში იასპარეზეს.

შეჯიბრში მონაწილეობა მიიღეს: გუდაურის, ბაკურიანის, მესტიის, აჭარისა და ბაკურიანის სპორტ-სკოლების ასოციაციის ნაკრებმა გუნდებმა.

ბავშვები  I,  დაბადების წელი 2005-2006

გოგონათა შორის ნატა მეხეშიძე გახდა ჩემპიონი, ვაჟთა შორის კი ოთარ წულეისკირმა გიამარჯვა.

ბავშვები II, დაბადების წელი 2003-2004

მარიამ ნავერიანმა და ლუკა ბუჩუკურმა მოიპოვეს გამარჯვება.

მოზრდილები და იუნიორები, დაბადების წელი 2002 და უფროსი ასაკი.

პირველი ადგილის მფლობელები: კატო გოცირიძე და ლაშა კურტანიძე გახდნენ.

შეჯიბრება რვა პერსპექტიულმა პატარა მოთხილამურემ გახსნა.

ეტაპებზე მიღებული ქულების ჯამი ახალგაზრდა მოთხილამურეებს, სამომავლოდ საქართველოს სათხილამურო ნაკრებში  მოხვედრაში დაეხმარება.

საქართველოს სამთო-სათხილამურო თასის ფინალური, მეოთხე ეტაპის - სლალომში და ფრისტაილის ,,ბიგ ეარში“ გამარჯვებული სპოტსმენები ,,კუდების“ უკანა მხარეს, ფინიშის ტერიტორიაზე მუსიკის თანხლებით საზეიმო ვითარებაში დაჯილდოვდნენ.

ვულოცავთ ჩვენს სამთო-მოთხილამურეებსა და პატარა ფრისტაილერებს ამ წარმატებას! 

საქართველოს სათხილამურო ფედერაციის თასის ეტაპების გენერალური სპონსორი კომპანია ,,სილქნეტია“, მხარდამჭერები - კულტურისა და სპორტის სამინისტრო, მთის კურორტების განვითარების კომპანია და კომპანია ,,ბორჯომი“. 

დამატებითი ინფორმაცია იხილეთ ფედერაციის ვებ გვერდზე: www.gsf.ge



 

 

 



 

 

 

 

 

 

სრულად 30 მარ

სნოუბორდისტმა ჯაბა სხვედიანმა სოჭში მეხუთე ადგილი დაიკავა

26 მარტს სოჭში საერთაშორისო სათხილამურო ფედერაციის ეგიდით სნოუბორდის სლოუფსთაილის დისციპლინაში გაიმართა შეჯიბრება - ევროპის თასის ეტაპი, სადაც ქართველმა სნოუბორდისტმა - ჯაბა სხვედიანმა იასპარეზა.

შეჯიბრში 8 ქვეყნის 35 სპორტსმენმა იასპარეზა. ფინალში 8 სნოუბორდისტი, მათ შორის ჯაბა  გადავიდა და საბოლოოდ მეხუთე ადგილი დაიკავა.

ჯაბას ვულოცავთ ამ წარმატებას!

 

სრულად 29 მარ

საქართველოს 2019 წლის სამთო-სათხილამურო თასის ფინალური ეტაპი გუდაურში გაიმართება

30-31 მარტს, გუდაურში  2019 წლის საქართველოს სამთო-სათხილამურო თასის ფინალური ეტაპი გაიმართება.  

შეჯიბრება  ,,კუდების“ ფერდობზე სლალომსა და გიგანტურ სლალომში ჩატარდება.

სამთო-მოთხილამურეები საქართველოს სხვადასხვა რეგიონებიდან სამ ასაკობრივ ჯგუფში იასპარეზებენ :

ბავშვები  I,  დაბადების წელი 2005-2006

 ბავშვები II, დაბადების წელი 2003-2004

მოზრდილები და იუნიორები, დაბადების წელი 2002 და უფროსი ასაკი.

შეჯიბრში მონაწილეობას მიიღებენ: გუდაურის, ბაკურიანის, მესტიის, აჭარის ნაკრები გუნდები, რომლებმაც გასული წლის შიდა რეგიონალურ ჩემპიონატებზე წარმატებას მიაღწიეს და საქართველოს მთავარ ჩემპიონატში მონაწილეობის უფლება მოიპოვეს. 

2018-2019 წლის ზამთრის სეზონზე სვანეთის, გუდაურის, აჭარის და ბაკურიანის სპორტ-სკოლების ათ-ათ მოთხილამურეს აქვს მოპოვებული უპირატესობა  საქართველოს თასის გათამაშების ეტაპებზე. სწორედ მათ მიეცემათ საშუალება ასახელონ თავიანთი გუნდები.

გუდაურში გამართული შეჯიბრების შედეგებით გამოვლინდებიან 2019 წლის საქართველოს სამთო-სათხილამურო თასის მფლობელები.

ეტაპებზე მიღებული ქულების ჯამი ახალგაზრდა მოთხილამურეებს, სამომავლოდ საქართველოს სათხილამურო ნაკრებში  მოხვედრაში დაეხმარება.

აღსანიშნავია, რომ 2018 წლიდან გუნდურ შეჯიბრში საქართველოს თასის გათამაშების გამარჯვებულ რეგიონს, გუდაურის დამაარსებლის სოლიკო ხაბეიშვილის სახელობის გარდამავალი თასი გადაეცემა.

1988 წელს გუდაური, როგორც სათხილამურო კურორტი, სწორედ სოლიკო ხაბეიშვილის დიდი ძალისხმევით დაარსდა.

1991-1993 წლებში სოლიკო ხაბეიშვილი იყო საქართველოს სათხილამურო ფედერაციის პირველი პრეზიდენტი.

გუდაურის კურორტის დაარსებისა და მისი განვითარების საქმეში შეტანილი ღვაწლის აღსანიშნავად, მეორე წელია სოლიკო ხაბეიშვილის სახელობის თასი  გადაეცემა გამარჯვებულ რეგიონს.   

უკვე მეექვსე წელია, რაც უმცროსი ასაკის გამარჯვებული მოთხილამურეები, გურამ გირგვლიანის ინიციატივით, სანდრო გირგვლიანისა და ირინა ენუქიძის ფონდიდან ფულადი პრიზით ჯილდოვდებიან. აღნიშნული პრიზი ახალგაზრდა სპორტსმენებისთვის სტიმულის მიცემის მიზნით დაარსდა. 

საქართველოს სათხილამურო ფედერაციის თასის ეტაპების გენერალური სპონსორი კომპანია „სილქნეტია,,, მხარდამჭერები - კულტურისა და სპორტის სამინისტრო, მთის კურორტების განვითარების კომპანია და კომპანია ,,ბორჯომი“. 

ხაზგასმით გვინდა აღვნიშნოთ საქართველოში ჩატარებული სამთო-სათხილამურო და ფრისტაილის ყველა შეჯიბრზე სპორტსმენების გვერდით ,,რედბულისა“ და სოსისების კომპანია ,,ვაკის“ მონაწილეობა.

საქართველოს თასის გათამაშების ფინალური ეტაპისა და საერთო ჩათვლაში გამარჯვებულები  შეჯიბრების დასრულების შემდეგ ,,cub``-ის მიმდებარე საგანგებოდ მოწყობილ ტერიტორიაზე მუსიკის თანხლებით საზეიმო ვითარებაში დაჯილდოვდებიან.

დამატებითი ინფორმაცია იხილეთ ფედერაციის ვებ გვერდზე: www.gsf.ge

საკონტაქტო პირი - სოფო ახმეტელი 577 47 77 01



 

 

 

 

 

სრულად 28 მარ